BilbaoArte ekoizpen artistikorako zentro bat da eta Bilboko Udal Gorenaren Kultur Sailari lotuta dago. Sortzaile gazteen eskura jartzen ditu beharrezko bitarteko eta azpiegitura euren egitasmo artistikoak garatzeko. Bere helburu nagusia artisten profesionalizazio nabarmena eskaintzea da, ekipamendu eta azpiegitura modernoak eskainiz.

1998an inauguratu zenetik, honako jarduera hauek garatu ditu: beka- eta laguntza-programak; izen handiko sortzaileek parte hartzen duten ikastaro, tailer, mintegi eta hitzaldiak; sortzaile gazteen erakusketak; artistentzako mugikortasun-programak beste arte-zentro batzuekin; eta erakunde-proiektuak garatzeko aholkularitza artistikoa.

Azpiegiturei dagokiela, BilbaoArtek 3.500 bat m2 erabilgarri dauka, lau solairutan banatuta, zamaketarako kaia eta gainera:

  • Erakusketa gela, edozein jarduera artistikorako egokituta, bai proposamen klasikoetarako nola instalazio, proiekzio, performanceak eta abarretarako.
  • Kristalezko Patioa, erakusketa, aurkezpen eta ikuskizunentzako espazio gardena.
  • Estudio edo lagapen-gune anitz egitasmo artistikoak garatzeko, trukaketako artistentzako gelez gain.
  • Eskultura eta eraikuntza, grabatu eta serigrafia, edizio eta inpresio, eta MediaLab (fabrikazio digitalerako) tailerrak, AudioLaba (soinua grabatzeko kabina isolatua), filmazio-aretoa eta errebelatu analogikorako gela iluna. Tailer hauek arte jarduerarako beharrezko makineria eta bitarteko guztiez hornituta daude. Halaber, langile adituak ere badaude. Hauek erabiltzaileei aholkuak eman eta azpiegituren funtzionamendu zuzena bermatzen dute.
  • Art House Zinema: hitzaldi eta proiekzioetarako aretoa.
  • Erabilera anitzeko gelak: tailer eta kurtsoetarako gune multifuntzionalak.
  • Magnoliaren patioa: magnolia batek gailentzen duen barru patio irekia, non artistak eta bisitariak atsedena eta airea hartu dezakete.
  • Atseden-gela: arte diziplina desberdinei buruzko aldizkari, agerkari eta katalogo ugari duen liburutegia. Erabiltzaileek eguneko prentsa kontsultatu edo nazio zein nazioarteko deialdi, beka zein bestelako ekintza artistiko-kulturalei buruzko informazioa hartu dezakete.